Stefania De Ruvo e je le autore di cheste comedie brilante in doi ats, che dentri di se e à un piçul misteri di risolvi. Un trop di feminis si cjatin intune curnîs insolite: la sale par i colocuis di une preson durant l’orari di visite. No je une novitât par lôr, jessint stadis in chel lûc plui voltis par fâ visite ai presonîrs, ma cheste volte al è alc che nol va: l’orari di visite al è tacât aromai di un pieç, ma ancjemò no si viôt nissun dai presonîrs.

Lis feminis riunidis e son, in realtât, dutis leadis in cualchi mût al stes presonîr e al è une vore stramp che si sedin cjatadis dutis a fâ visite tal stes moment, stant che al sarès proibît dal regolament de preson, però e je une grivie situazion su la cuâl a indaghin une poliedriche investigadore in incognit, in colaborazion cuntune secondine dute di un toc.

Ancje se le ambientazion e podarès fâ pensâ a un drame o a un zâl, cheste e je une opare che e dopre il lengaç de comedie par indusi une riflession sul rapuart tra mascjo e mascjis, tai diferents rûi de vite come mari e fi o pûr om e femine, che in cierts câs a puedin puartâ a dipendence afetive e sieltis di vite disarmonichis e che a limitin.

La storie si distrighe tra scuintris di personalitât e ironie, che nus compagnin fin a un finâl sorprendent.