Vinars ai 18 di Setembar, tal Salon d’Onôr di Palaç Mantica a Udin, si son tignudis lis elezions pal rinovament dal Consei Diretîf de Associazion Teatrâl Furlane APS.

La gnove Assemblee e à elet Stefano Pandolfo come President de Associazion. Atôr de compagnie La Pipinate APS di Sclaunicco, za Vicepresident de ATF, Pandolfo al è ancje autôr e regjist teatrâl.

Pandolfo al cjape il puest di Guido Covazzi, che al à vuidât la Associazion tal ultin trieni, durant il cuâl la ATF e à puartât a tiermin impuartants progjets, tra i cuâls il gnûf Statût, conformi al Codiç dal Tierç Setôr, la iscrizion al RUNTS, la realizazion dal gnûf sît internet, la organizazion di cors di recitazion, scriture teatrâl e regjie e doi concors dedicâts ae dramaturgjie in lenghe furlane.

La ATF e ringrazie di cûr Guido Covazzi e ducj i components dal Consei Diretîf di prime pal lavôr fat, pal impegn e pe disponibilitât dimostrâts in chescj agns e pal impuartant contribût dât ae cressite de Associazion.

Il gnûf Consei Diretîf al è componût, in plui dal President, di Paolo Zamparo (Vicepresident), Raffaella De Marchi, Manuela Genero e Alberto Soramel.

La Associazion, che e riunìs 50 compagniis teatrâls, e continue cussì il so impegn te promozion e te valorizazion dal teatri amatoriâl furlan e de dramaturgjie in lenghe furlane.

Te fotografie, di çampe, Zamparo, Covazzi e Pandolfo.