La contesse Lydia Hornik de Nordis, nassude a Salcano tal 1921, e à passât la vite tra Gurize e il Kenya, so tiere sielte. Spirt libar, combative e anticonformiste, e à sfidât lis convenzions e il destin. In gracie dai leams cun figuris di rilêf, come Sarah Churchill e Eisenhower, e je rivade a salvâ la vile de famee da lis ridefinizions dai confins dopo la vuere. Cressude intun ambient aristocratic, e je stade segnade in maniere profonde di so barbe Pula, che le à puartade par la prime volte in Kenya tal 1934: un viaç che i à fat scuvierzi la Happy Valley come patrie de anime. Lyduska e à vivût un grant amôr cun Nanni, ami de infanzie di origjinis umilis, sielt cuintri ogni regule sociâl; insiemi e àn condividût agns intens in Afriche, sposantsi dome tal 1963. E je muarte a Nairobi tal 2006; la sô cinise e polse a Gurize.