Il sucès des divertentis comediis e le armonie tra i components de “Grande famee ruvignote” e son une vore inmagants: il leam tra i components dal grup al à alçât la creativitât e il coraç di creâsi lis storiis pes comediis e la recitazion cence il supuart di un copion scrit. Za, parcè che chescj artiscj di culine a àn la braùre di inventâ lis tramis dai spetacui, di colorâ i personaçs e cun chei personaçs movisi te sene par contâ emozionantis e aventurosis storiis.

Spontaneitât e improvisazion a garantissin ta ogni repliche un spetacul unic. A risalte la gjenuine ligrie e la filosofie dal grup: divertîsi e fâ divertî, une sielte semplice puartade indenant cun la cussience di trop che si pues comunicâ cuntune bocje di ridi. Il svilup de culture furlane, il recupar des origjinis, la convinzion che zuiâ cu la nestre indentitât nus predispon par apreçâ ancjemò di plui lis diviersis culturis e lis arts dal mont.

La compagnie e à vivût grandis esperiencis – e à recitât 5 voltis par i emigrants a Paris; si è esibide al Fogolâr di Limbiate (MI); te preson di Tumieç e a Spoleto (Umbrie) – e tirât dongje une vore di sodisfazions tai teatris regjonâi. Inventant lis propris comediis e rindint reâls lis sôs fantasiis, cheste compagnie e à di sigûr scrit une biele pagjine de storie di Ruvigne.