Chescj agns il “vecjo” al jere tignût in grande considerazion in famee; al ere scoltât e rispietât; fîs e nevôts i davin dal “Vô” e, ancje se al pierdeve il sintiment, nissun si azardave a cjolilu vie. Rivât dongje al colm de vite, al veve dirit di polsâ; se si inmalave si lu curave in cjase e al podeve murî tal so jet. Tal ricovar e levin dome i derelits. Cumò la peraule “vecjo” e sune di sorpassât; miôr dîsi “anzian”, ancje parcè che vuê i nonos a scuegnin jessi in gjambe, judâ i fîs e stâ daûr dai nevôts, no lamentâsi mai e no meti il bec tai lôr dafâs. Cussì fintremai che la salût e ten bot. Ma cuant e ven la lôr volte di vê bisugne, alore a tachin i fastidis par vie che nissun nol à ni timp, ni voie di viodi di lôr. Par chel e je un grum svilupade la industrie des cjasis di polse e des assistentis di famee. Intes fameis il nono al devente un intric, un grop di discrosâ, un rivocâ tra i parincj che si domandin: “Ce fasino dal vecjo”?