Al jere il 1998 cuant che e je nassude la compagnie e e à tirât dongje al regjist Antonio Bertolla un biel trop di fantats e adults apassionâts di teatri. De sô nassite fi al dì di vuê, il grup al à metût in sene une comedie al an, puartant cualchidune ancje sui palcs di sene fûr paîs e parfin a Paris, ospits dal Fogolâr Furlan francês. I lavôrs a son simpri in lenghe furlane, parcè che il nestri intindiment al è propite chel di mantignî vive la nestre marilenghe. Se no si rive a cjatâ tescj che a sodisfedin la compagnie, si voltin oparis di autôrs famôs, adatantju aes esigjencis numerichis dal grup. Tantis personis si son dadis la volte tai agns, cualchidun purtrop nus à ancje lassâts, creant un vueit che no si po colmâ.  Ae regjie si è dade di fâ Irene Cipriano, daspò che Bertolla al veve lassât e cumò la cure Carla Monai. I atôrs a son cirche une cuindisine.

Ce che al è biel fâ notâ, al è che di an in an la compagnie e cjate simpri cui che al sostituìs i atôrs che, par cualsisei motîf, a lassin il palc di sene: si cree cussì un ricambi, che in chest moment al viôt convivi tal grup personis des etâts puli diferentis, ma che a san stâ insiemi e divertîsi compagn, superant il divari gjenerazionâl.

Une compagnie, duncje, che si rinove e che e je vierte a dâi acet a cualsisei che al vedi voie di provâ cheste ativitât, che e insiore e e jude a superâ barieris e pôris intun clime di divertiment e condivision, puartant indenant il cult de nestre lenghe furlane.