A metât dai agns ’70, un trop di zovins apassionâts di teatri al à dât vite al grup di ‘Sevean; dopo plui di dîs agns di ativitât, il 17 di Jugn dal 1987 al è stât firmât l’at costitutîf e il grup al à cjapât il non di “Lis Anforis”, ispirât ae cjatade di une fornâs romane tal paîs. Di chê volte o vin rapresentât une cincuantine di lavôrs, soredut par furlan e di gjenar brilant. 

Fin dal imprin o vin metût in sene tescj di autôrs furlans come Pellarini, Michelutti, Marioni, Gioitti Del Monaco, De Luisa, Smaniotto, Cjanton; tai agns ’90 si sin misurâts ancje cun Goldoni, Jonescu e Disette, in gracie de regjie di Tullio Svettini. De metât dai agns ’90, un nestri atôr, Renato Sclauzero, si è scuviert autôr e di chê volte, gjavant cualchi ecezion, o presentìn oparis scritis di lui. Tal 2001 o vin preparât un musical cuntune cincuantine di atôrs e balarins, esperience impegnative e uniche. Po dopo, pe Cuaresime e par Nadâl, o vin preparât rapresentazions sacris in glesie. Tal 2004 o vin puartât in sene un lavôr complès cun 19 atôrs, cu la regjie di Francesco Accomando, che al à contribuît ae nestre cressite artistiche; un laboratori cun Luca Zalateu nus à permetût di miorâ la dizion, la vôs e la concentrazion. Tai ultins agns o vin preferît comediis brilantis, par trasmeti al public il divertiment che o provìn sul palc. Tal 2010 o vin partecipât al concors di teatri comic a Rivignan, rivant seconts; tal 2012 o sin tornâts e o vin vint il premi dal public. Tal 2009 e 2010 o vin puartât i nestris spetacui, tal ordin, in Pulie e in Abruç tes zonis taramotadis.

Di cualchi an incà o organizìn une rassegne estive in lûcs carateristichis dal paîs; tal 2012 o vin preparât, cun Tullio Svettini, une leture senade trat di une conte di Caterina Percoto par festezâ i 200 agns de sô nassite, rapresentade ancje te cjase de nassite de scritore. Il 2012 par nô al è stât un an impuartant: o vin festezât i 25 agns di ativitât certificade, une ocasion par cjalâ il passât e programâ il futûr. I nestris lavôrs a son simpri disponibii par sei riproponûts su richieste.