Une storie dai contors sureâi, une comedie che e podarès benon fâ part dal repertori dal grant Woody Allen.

Une famee formade di un om smemorât, une femine avonde energjiche, une fie zovine e gaiarine e une vecje agne in mût inesplicabil mute e àn di partecipâ al funerâl dal barbe Selmo, un om implicât in afârs sporcs e fumôs. Tra lis visitis par lis condoleancis e rivin doi stramps individuis dal aspiet funebri, un ciert Amintore Disgrazia e la siore Lola Lasfiga, puartadôrs di peule elevade ae massime potence, grancj frecuentadôrs di funerâi. E fâs la sô part ancje une vicine di cjase da lis formis bondantis, vere cjaçadore di oms, tant di jessi paragonade di ducj a un caiman.

La storie si imberdee une vore par colpe de vignude di un comissari di polizie e di un agjent sielt, che a indaghin su di un grues trafic di droghe là che al somee implicât propite il barbe in cuistion.  Fin cuant che, bot e sclop, no salte fûr une misteriose polvarine blancje, che nol è borotalc, ma nancje nêf, ancje se tal zergon al pâr che si clamedi cussì. Al salte fûr ancje un ardît fantat che al rive dal Venezuele, che nol fevele il talian…

Man man che la storie si imberdee, a cressin i efiets comics e il ritmi si fâs plui frenetic, fin a tocjâ il massim intun finâl pardabon di no crodi.