Si conte che une volte, tancj ma propite tancj agns indaûr, l’aloc al jere l’animâl plui inteligjent dal bosc. Par vie di cheste sô dote, chei altris animâi nol lu lassavin mai in pâs: cui che i domandave un consei, cui che si faseve spiegâ alc, cui che i puartave cuistions di risolvi, cui che i domandave di fâ di judiç… e vie indevant.

Stuf di no vê mai un moment di trancuilitât, l’aloc al domande aiût a Mari Nature che, par judâlu, i cambie l’aspiet, dantji une muse di stupit, come che al vignarà contât tal finâl dal spetacul.

Une matine, un zovin cuc che al cîr une sistemazion al disturbe il sium diurni dal aloc, fasint esperiments sot dal so nît.

Cussì i doi personaçs si cjatin, si cognossin e, midiant i lôr dialics o sintìn diviersis divertentis storiis di animâi dal bosc e no dome: il spuç, il mus, la ‘save, la civuite… fin a assisti ae conte de creazion dal mont e dal animâl plui pericolôs di ducj: l’om!!!

Une situazion che e evoche atmosferis sugjestivis e, tal stes timp, comichis e nus fevele dai oms dal pont di viste des creaturis dal bosc, cuntun delicât ma significatîf riferiment ae necessitât di un plui grant rispiet pe nature e pai siei fragjii ecuilibris.

Une sorte di flabe ecologjiche, insome, adate ai fruts di dutis lis etâts.