La Compagnia dei Guitti APS

La Compagnia Dei Guitti e je nassude formalmentri tal Autun dal 2006, ma la semence di chest flôr, dut câs, al cjate teren fertil tai alore zovins socis fondadôrs tal lontan 1989. In chel periodi Sabine Cattarossi si trasferìs de France, scune de sô formazion teatrâl, inte nestre regjon e e met dongje un grup di zovins par introdusiju ae art dal teatri.

Dopo un deceni di formazion maduride in lûcs di fortune,garage e spazis plui o mancul adats al fin, tal 2001 il grup, afinât e screât, al rive al debut cun Vuoto a perdere, scrit di Samuele Cattarossi pe regjie di Sabine Cattarossi e ordenât de Union Nazionâl Art e Spetacul. Tal mês di Mai dal 2005, al Teatri L. Garzoni di Tresesin, al sarà il moment di Berdei, cumò us conti jo la veretât, parodie demenziâl scrite simpri di Samuele Cattarossi e ispirade ae storie dai famosissims Beatles, trasformâts te conte in emigrants furlans, simpri al flanc di Sabine Cattarossi, in colaborazion cul grup musicâl furlan Beât Lés e la Associazion NUMAR UN di Alberto Zeppieri (Toni Merlot).

Tal Autun dal 2006 si costituìs formalmentri la Associazione Culturale La Compagnie dei Guitti, che e debute cul spetacul Anghel, pal cuâl Marco Maiero al componarà une colone sonore origjinâl e sugjestive, inte primevere dal 2007. Tal 2008, in colaborazion cul atôr Federico Scridel, la compagnie e invente Fabulastrocche, une farse bilingue (talian-furlan), dulà che si messedin prose, poesie e filastrocje intune sucession di gag iresistibilis.

Tai agns a si son seguîts altris produzions artistichis (Lettere di un bimbo, O soi dome un omp), firmadis di Samuele Cattarossi, pe regjie di Sabine Cattarossi, e la metude in sene di un spetacul scrit di Carlo Tolazzi cul titul Rojale. Tal 2015 al rive Busis, Mateçs e Matarans, une pièce goliardiche e iriverente in lenghe furlane e taliane. Tal 2016 la Compagnie e met in sene un ricuart sintût dal tragjic taramot dal 1976, cul titul Mnemosine ’76, e tal 2017 al debute Prejudizi e orgoi, a cure di Silvia Benini e Sabine Cattarossi.

Ogni an, infin, la Associazion e organize un cors di teatri par fruts e fantats di etât comprendude tra i nûf e i disesiet agns, finalizât ae metude in sene di un spetacul inserît inte stagjon culturâl dal Rojale.

A Dicembar dal 2019 al debute l’ultin lavôr de compagnie, cul titul Embryo. Chi, dut al è pussibil, cun dôs datis: ai 14 di Dicembar aes 20.45 al Auditorium di Paulêt e ai 15 di Dicembar aes 18.00 al Teatri “Mons. Lavaroni” di Dartigne.

  • Non de compagnie
    La Compagnia dei Guitti APS
  • Provincie
    UD
  • Referent
    Samuele Cattarossi

Talian