“Castigat ridendo mores” (corezi i costums cul ridi) e je la essence di chest spetacul, che al viôt protagonistis dôs sûrs, Ane e Mine, paronis dal bar “Il cjalderon da lis striis”.

La vicende e met in lûs, in clâf umoristiche, il rapuart om femine fat di prejudizis, lûcs comuns, injustiziis e incomprensions. oms e feminis a son doi monts par lôr cont, che si atrain e si parin vie a voltis in maniere lizere e scherçose, a voltis, purtrop, in mût dramatic.

L’incrosâsi des storiis che i personaçs a contin al ven bot e sclop interot de scuvierte di un segret che al ruvine il rapuart di Ane cul so om Duccio: chi la comedie e cjape une ande dramatiche, cuntun finâl a sorprese.

“Il cjalderon da lis striis” al vûl sdramatizâ il contrast che al esist tra il mont maschîl e chel feminîl, cirint propite te diversitât il pont critic de cuistion e individuant tal rispiet vicendevul la strade che e puarte a une convivence felice.