Il Circul Culturâl e Ricreatîf “La Pipinate” al nas tal 1979 a Sclaunic (Udin). Il non al derive dal sorenon cun il cuâl i fruts dal paîs a clamavin la statue de Vitorie parsore il monument pai muarts di vuere, sot de cuâl si cjatavin par zuiâ, deventant simbul di agregazion.

Tal 1980, in gracie de iniziative di Mons. Giuseppe Faidutti, plevan di Sclaunic, e ven fondade la compagnie teatrâl, che po e devente part integrant dal Circul. Le ativitât teatrâl tal paîs, in ogni câs, e à lidrîs plui antighis: la prime compagnie e je nassude tal 1938, sostignude dal plevan don Calligaro, e e je continuade fin tal 1952, cuant che un incident a ‘nd à interote le ativitât. Dal 1980 la compagnie “la Pipinate” e je ative cence interuzions, celebrant tal 2025 i 45 agns di ativitât. Ogni an e propon un gnûf spetacul, simpri in lenghe furlane e soredut di gjenar comic, cun la intenzion di ufrî al public moments di svagament e ligrie. La sielte des comediis e rispuint ae convinzion che il divertiment dai atôrs durant lis provis si rifleti in maniere positive sul public.

Doi e son i apontaments principâi de stagjon teatrâl: la Rassegne Teatrâl Comunâl di Listize il mês di Mai, la che a debutin cun il gnûf spetacul, e il fin setemane teatrâl di beneficence, la che dut il rigjavât al è destinât dal 2004 ae associazion “Via di Natale” di Davian. 

La compagnie e je fate di atôrs diletants che a recitin dome par furlan, mantignint vive la tradizion dal lengaç locâl. La lôr mission e je chê di regalâ divertiment e sugjeriments par rifleti, sielzint tescj di autôrs talians e forescj, po dopo voltâts par furlan al interni dal grup.

Tal 2023 La Pipinate e à partecipât al 7° Gran Premio F.I.T.A. del Teatro Regionale FVG cun il spetacul “Le ale o la cuesse?”, otignint doi ricognossiments: Miôr preparazion seniche e Miôr atôr protagonist.