Millemosche, cavalîr cence cjaval, insiemi al fedêl Ciabatta e ai compagns Sfortunato e Carestia, al vîf une cundizion di estreme puaretât, là che la uniche alternative ae fam al è il rangjâsi cun espedients improvisâts. Durant la lôr strade a incuintrin però un misteriôs om che ju invide a sentâsi in taule cul lui. Chi, tra pan fresc, mignestre cjalde e vin, i cuatri a cjatin no dome solêf fisic, ma ancje nudriment interiôr in gracie ae conte che l’om al ufrìs lôr.

La narazion ju coinvolç in maniere profonde, trasformant chel moment intun viaç simbolic, simil a une odissee popolâr e contadine, plene di poesie, memorie e umanitât. Midiant imagjinis, sunôrs e sugjestions, i protagoniscj a tornin a scuvierzi il valôr dal stâ insiemi, dal scoltâ e dal vivi il presint. Il viaç al devente cussì esperience di trasformazion, fate di incuintris, emozions e cambiaments interiôrs. Ancje restant fers, si po viazâ: e je le anime a movisi, vierzintsi a gnovis cussiencis e al desideri, un dì, di tornâ a cjase insiorâts.