Un ricognossiment prestigjôs par Gatto Nero
Ce che o viodarìn in chest articul
Valeria Murianni, de compagnie teatrâl Melodycendo APS, e à vinçût a Milan il Premio Nazionale Anima Mundi pe dramaturgjie feminîl cu la sô opare “Gatto Nero”.
Un ricognossiment prestigjôs pal teatri leât al nestri teritori: la atore e autore Valeria Murianni, de compagnie Melodycendo APS e afiliade ae Associazion Teatrâl Furlane APS, e à vinçût il Premi Nazionâl Anima Mundi pe dramaturgjie feminîl.
La opare premiade, “Gatto Nero – gli ultimi guardiani di un manicomio”, e je stade selezionade jenfri plui di 30 tescj rivâts di dute Italie e valutâts di une jurie che e veve a cjâf Ombretta De Biase, promotore e coordenadore de iniziative. Dongje dal test vincidôr, a son stâts segnalâts a pari merit altris cinc lavôrs di autoris rivadis di diviersis citâts talianis, a conferme dal alt nivel cualitatîf de selezion.
La cerimonie di premiazion si è davuelte tal sugjestîf claustri Nina Vinchi dal Piccolo Teatro di Milano, lûc simbul de sene teatrâl nazionâl. In cheste curnîs, Valeria Murianni, insiemi cun Marco Gallo de compagnie Melodycendo, e à presentât al public cualchi estrat de opare, ufrint une intense anteprime dal lavôr premiât.
Il premi al è stât organizât in colaborazion cu la Societât Taliane Autôrs Dramatics e cul patrocini dal Comun di Milan.
Chest impuartant travuart al rapresente un motîf di grant orgoi pe Associazion Teatrâl Furlane APS, che e viôt ricognossût il valôr artistic e l’impegn dai siei afiliâts tal panorame teatrâl nazionâl.
