La compagnie teatrâl “I Pignots” e nas a Dartigne tal 1991. Il grup si definìs “instabil” parcè che la po cambiâ tes presince a seconde des ocasions e des disponibilitâts dai components; al reste invezit simpri compagn il desideri e la intenzion di fâ rivivi le autenticitât dal vivi furlan, libar dai condizionaments imponûts da la culture moderne. In particolâr si vûl valorizâ la imediatece e la musicalitât dal lengaç, tal limiti dal pussibil chel dartignûl, “pignot” par jessi precîs, caraterizât di une cadence uniche te zone e tal Friûl. La compagnie si fonde su une solide intese, che i permet di produsi, ampliâ e miorâ i tescj e di gjestî in maniere autonome regjie, realizazion seniche e tecniche. Lis tantis rapresentazions, puartadis ator tai agns in dut il Friûl, e àn tirât dongje pardut entusiastics consens.

Le autore dai lavôrs, Anna Maria De Monte, che e je ancje atore, cun i siei scrits si impegne a salvâ e a tramandâ la memorie di un Friûl che al somee destinât a sparî. Il mot de compagnie, “Si po ridi dibant, si po ridi judant, baste no fâsi ridi” al caraterize une ultime motivazion dal so “fâ teatri”: gjavadis lis spesis vivis che a coventin par gjestî le ativitât, il rigjavât che al ven fûr al ven dal dut destinât a Ents e Associazions che a lavorin tal ambit de solidarietât.