Sabide ai 7 di Novembar, tal Teatri Mascherini di Daçan, si è tignude la cerimonie di premiazion de 10me edizion dal Gran Premi FITA FVG 2026 dal teatri amatoriâl.
Grande sodisfazion pes compagniis afiliadis ae Associazion Teatrâl Furlane che a àn partecipât al concors e che a àn otignût ben cuatri prestigjôs ricognossiments, confermant ancjemò une volte la cualitât, la passion e la vitalitât dal teatri amatoriâl dal nestri teritori.
Ae compagnie Pro Loco di Chions APS – Cibìo i è stât assegnât il premi pe miôr senografie, realizade pal spetacul “Vento dell’Est”.
Un impuartant ricognossiment ancje par Daniela Zorzini, che e à vût il premi pe miôr regjie cul spetacul “Fin a prove contrarie”, puartât in sene de compagnie Il Magazzino dei Teatranti.
Dopli risultât pe compagnie TeatroTuttoTondo APS – RetroScena!, che cul spetacul “Buio interno stanza“ e à concuistât doi dai ricognossiments plui ambîts de manifestazion: Riccardo Cicconetti al à ricevût il premi come miôr atôr protagonist, intant che il spetacul si è vuadagnât il titul di miôr spetacul.
Un risultât une vore significatîf, che al permetarà ae compagnie di rapresentâ il Friûl Vignesie Julie al prossim Gran Premi dal Teatri Amatoriâl FITA.
Cuatri premis che a son un motîf di braùre no dome pes compagnis e pai artiscj premiâts, ma ancje par dute la comunitât teatrâl che l’ATF e à il plasê e l’onôr di rapresentâ.
La Associazion Teatrâl Furlane si complimente cun ducj i vincidôrs, cun lis compagnis coinvoltis e cun ducj chei che, devant e daûr des cuintis, a àn contribuît a chescj impuartants risultâts.
Risultâts che a dimostrin cemût che il teatri amatoriâl furlan al sedi une realtât vive, buine di esprimi talent, creativitât e cualitât artistiche. Une ricjece culturâl di continuâ a sostignî, valorizâ e fâ cognossi.
