Il Tendon Young al è nassût cuasi par zûc tal 2018 dal Grup Teatrâl El Tendon, par rispuindi a une simpatiche richieste di animâ un spetacul musicâl dal Cors Bandistic di Cuar di Rosacis. Nus è plasût cussì tant che no vin ancjemò finît di zuiâ!

I nestris fruts a àn dai 14 ai 19 agns, a frecuentin variis scuelis e a son unîts di une grande voie di metisi a la prove. Lis regjistis… no son veris regjistis! A son dôs sunadis che si divertissin a stâ cui fruts e a fâ teatri: il grup al è amatoriâl, fâ part di lui al è dal dut gratuit, ma cun dut chest o vin metût in sene cualchi spetacul che nus à dât grande sodisfazion.

In colaborazion cu la bande o vin rapresentât I Musicants di Brema (2018) e Il Gjat cui stivâi (2019), ducj doi su musichis di Angelo Sormani. Al è seguît Avventure in Biblioteche di Filippo Mussi (2021/2023), interot e tornât a scomençâ plui voltis a cause dal Covid. O vin presentât la leture animade di Cjant di Nadâl di Charles Dickens tal Dicembar 2021. Tal 2024 i fruts a vevin voie di sperimentâ un spetacul di grancj, cussì o vin provât cun Trappole per topi di Agatha Christie.

Un progjet particolâr al è Senza Rete, un spetacul trasversâl dulà che i components dal Tendon Young a recitin cun i senior dal Grup Teatrâl El Tendon (chei che i 19 agns ju àn passâts di un biel pôc di timp, par capîsi) che al à come fin chel di meti in atenzion fruts e adults sui pericui online e di sensibilizâ ducj sul ûs coret dai social. Chest spetacul, oltri che jessi zirât in Friûl, al è stât puartât a Bologne.

Pal 2025 o stin preparant… no, no us disìn nuie: al è ancjemò un segret!