Di une idee coragjose e visionarie di don Paolo Nutarelli, zovin capelan de Parochie di Çarvignan, te sierade dal 2000 al nas il grup di teatri dal Ricreatori San Michêl di Çarvignan, ta chê volte ancjemò cence non. In maniere uficiâl al è il 2001 l’an di nassite di Briciole d’Arte: a Jugn al è stât il prin spetacul da titul “È un nuovo giorno”, une comedie musicâl inedite, scrite di Romana Maiori e Jenny Rivetti. Di chê volte chest progjet teatrâl al è simpri stât in ativitât, proponint e preferint tescj di comediis musicâls. Tai agns il grup al è madurît e si è evolût in diviersis formis, fin a rivâ a trê laboratoris autonoms: lis Briciole Junior (fruts), lis Briciole di Mezzo (zovins) e lis Briciole Senior (adults). Tal 2008 “Il cerchio della vita”, comedie musicâl ispirade al famôs carton animât de Disney Il re leone, al coinvolç ducj i trê grups intune grande produzion, che e viôt i adults come interpretis e fruts e zovins impegnâts tes coreografiis. Di chel an indenant, planc a planc, e son lis Briciole di Mezzo a strissinâ indenant la compagnie, che e torne a jessi e a clamâsi, juste apont, Briciole d’Arte.

In chest moment, tra atôrs e tecnics, i components a son cirche 30: students e lavoradôrs (impleâts, insegnants, libars professioniscj e inzegnîrs) di une fasse di etât tra i 12 e i 40 agns. Briciole d’Arte al è un laboratori teatrâl che nol à finalitâts di vuadagn e al è fondât sul volontariât culturâl, ma soredut sul amôr par il teatri e il divertîsi insiemi proponint spetacui dal contignût educatîf e tal stes timp cence pinsîrs.

Inamorâts dal palc di sene, no vin mai sintût vignî mancul la nestre passion par il teatri. braurôs di vê recitât in grancj teatris e in teatris che di teatri a vevin dome il non. Denant a dîs come a cuatricent spetatôrs. Plui che amatoriâi, si sintìn amants. Amants de art, de cure dai particolârs, de preparazion curade dai personaçs, de atenzion e dal rispiet che i nestris spetacui a vuelin ufrî al public.