Lis origjinis de compagnie e van cirudis a Talmassons za tai agns ’20 dal secul passât, ma purtrop, par colpe di di une serie di fatôrs, la societât e je stade costrete a sierâ lis antis tal 1960.

Al è par merit di un grup di apassionâts se tal 1980 e nas la presinte compagnie filodramatiche “La Risultive”, e cualchidun di lôr a son ancjemò ferbints di manifestâ la lôr passion par il teatri e a colaborin ancjemò. Cun chest spirt, tal lontan 1981 “La Risultive” e à debutât, in gracie dal slanç di Amerigo Turello, Renato Bigoni e Marisa Pestrin, cun la comedie “L’autôr” di Smaniotto, par dopo continuâ cun ducj chei lavôrs che aromai a fasin part de tradizion, come “Une sblancjade di Pasche”, “I Napoleons tal Cormôr”, “Il condot tal ort”, “Pauline la mê ruvine” dopo par nomenâ cualchidun.

La compagnie e à volût misurâsi cun tescj contemporaniis e cussì e à puartât in sene il spetacul “La pese”, cun la regjie di Claudio Moretti. Daspò tai ultins agns a son rivâts, sot de regjie di Andrea Chiappori, cun il cuâl e continue ancjemò la colaborazion, “Al è simpri timp par maridâsi”, lavôr teatrâl che al à permetût ae compagnie di vinci une vore di premis in tantis plateis de regjon, par po continuâ cun “Matrimoni… par fuarce”, “Cheste cjase a è un albergo”, “E… nell’attesa Kabarett”, spetacul trat dal “Tingeltangel” di Karl Valentin.

Ore presint la compagnie e stâ proponint doi spetacui:

“Nemici come prima” dal autôr roman Gianni Clementi, che al à za viodût plui di 30 replichis sui varis palcs de nestre regjon. Chest lavôr al pues jessi proponût sedi par talian sedi par furlan;

“Volpone”, trat dal test teatrâl dal autôr inglês Ben Jonson. Ae preparazion di chest lavôr a àn partecipât ancje atôrs  esternis ae compagnie.

Di pôc e à inviât il studi di un gnûf test teatrâl, dal titul “Ben Hur”, simpri dal autôr Gianni Clementi.

La Risultive a promôf ancje une vore di cors tal ambit teatrâl, cirint di pandi cheste art ancje tes scuelis dal propri comun, cun laboratoris par i fantats.