Nespoledo ‘80 e à origjin plui di cuarante agns indaûr, costituintsi in maniere uficiâl tal 1980. la compagnie e à podût cussì fâ stât te disponibilitât di cualchi personis che a vevin fat part dal grup filodramatic che e lavorave tal dopovuere e, soredut, tes sperancis dal public paisan. Par i ex atôrs la gnove esperience e à permetût di respirâ l’aiar de proprie zoventût, di tornâ a vivi jenfri il grup il sens de solidarietât e, viers il public, il gust de finzion seniche e de rapresentazion. Ma di altris la filodramatiche e je stade rindude une realtât impuartante: diviersis personis, di fat, e àn ritignût di spindi part dal lôr timp par preparâsi a frontâ il palc di sene. E cheste e je une robe une vore confuartante, soredut se si pense al interès dimostrât dai zovins, segn che il gust par il teatri a Gnespolêt al à lidrîs profondis. Di sigûr si trate di un teatri popolâr, fat in cjase, ma, propit parcè che spontani, no mancul interessant dal cussì clamât studiât. In fin dai conts la bontât de opare teatrâl e je dade dal gradiment che e cjate tal pubilc e chest gradiment, cul passâ dai agns, nol è vignût mancul, anzit si è rinfuarçât. La filodramatiche no à mai ritignût di confrontâsi cun altris realtâts di sigûr plui impuartantis, ma no à patît nissun sens di inferioritât: jê di fat e esprim la culture de nestre int, viers la cuâl e à simpri rivolt il propri lavôr. La filodramatiche e à ancje cirût e e stâ cirint dai temis e dai contignûts gnûfs, proponint tescj inedits. Si pues dî, duncje, che il grup al gjolt di buine salût e che si è consolidât sedi tal so interni, sedi tal paîs e tal comun di Listize. A chest procès al à di sigûr zovât la tradizionâl rassegne dai grups teatrâi, organizade dal Comun. Fâ teatri par nô nol è dome interpretâ il test di un scritôr, ma rapresentâ moments di cressite, di confront e di vite di comunitât.