Nassude tal imprin tal ambit parochiâl paisan, la compagnie filodramatiche Sot La Nape si è costituide in maniere uficiâl tal 1975, svantant vuê cuarte agns di storie e di ativitât amatoriâl teatrâl. Tal passât, oltri aes rapresentazions in ambit locâl e provinciâl, no je mancjade le ocasion di ampliâ il propri rai di azion sul teritori regjonâl o in piçui fogolârs furlans (Turin, Milan, Latine, e vie indenant), pontant a valorizâ e a mantignî come caratar principâl la componente in lenghe furlane.

Cul passâ dai agns e son subentradis diviersis personis al interni dal grup, si è rivâts a a varis tip di public e a son stadis rapresentadis une vore di comedis: I ruspiôs, La cjase gnove (tescj voltâts par furlan dai origjinâi di Goldoni), Il pont da la Silvie e Trê mateçs par un anel (tescj di Paola Tubaro, regjie di Luciano Rocco), La foghere e Lis disgraciis a van come i fraris – mai solis (tescj di Luciano Rocco, regjie di Lindo Pagura), La partide dal vinars (voltât par furlan in maniere libare di Paola Tubaro di “La strana coppia” di Neil Simon), e la inedite Eline (adatament par furlan di Paola Tubaro di une des ultimis produzions di Luciano Rocco, cun la regjie di Alex Campagner).

Tal 2011 e à debutât cun la comedie Siet ninins… sassins (libare interpretazion di “Otto simpatiche donnette” di Salvino Lorefice), cun la regjie di Claudio Mezzelani. Po dopo, tal 2013, al è stât fat Ce comediis chest Nadâl!, comedie brilante cun la regjie interne, che e smirave a coinvolzi zovins atôrs subentrâts te compagnie. Tal 2014 al è stât fat il spetacul Vôs di Friûl. Storie de Patrie indivise, ispirât ae storie de tiere e de int furlane. L’ultin spetacul dal grup, Dal 7 al 9, cun la regjie di Claudio Moretti, al à debutât tai prins dal 2017. L’ultin lavôr prodot al è News in the gnot, in sene te Istât dal 2018, simpri cun la regjie di Claudio Moretti. Il test al è trat di “Feu la mère de madame” di G. Feydeau e al è stât adatât in maniere libare e voltât a cure de compagnie.