Il G.A.D. Quintino Ronchi al nas tal aromai lontan mês di Mai dal 1967 cun la intenzion di tornâ a cjapâ une tradizion rivade, a S. Denêl, almancul tal XVII secul e al cjape il non di un gloriôs gjenerâl dai alpins, che dopo la Grande Vuere, al è deventât sindic de citadine e che al à scrit une grande serie di lavôrs teatrâls, par talian e furlan, pe filodramatiche dai prins dal ‘900. Al à sielzût di dâ preference a autôrs dal sandenelin (Dree Sflacje di fin ‘800, Quintino Ronchi de prime metât dal ‘900, Renato Floreani e Roberto Ongaro contemporaniis) par po dedicâsi ae metude in sene di oparis premiadis o segnaladis ai concors de Associazion Teatrâl Furlane, de cuale il G.A.D. al è stât un dai grup fondadôrs. Tai ultins agns si zove dai tescj scrits di Michela Romanello, autore e atore de compagnie.

Fin a vuê plui di 50 spetacui fats no dome in Friûl, ma ancje tal rest de Italie e tal forest. Vastissim il repertori che al conte comediis e ats unics, tescj comics, dramatics e storics par furlan e talian.