La compagnie “Officina Teatrale Gonars” e nas dentri de Associazion Culturâl “Le Androne tal 2015 e tal 2019 e devente “Le Androne APS Officina Teatrale Gonars”.

E môf i prins pas e si consolide metint impins, pe regjie di Oscar Mariotti, la comedie brilante e discjantade “Se non mi arrestate l’ammazzo” e dal 2017 la compagnie e oriente la sô ativitât sul teatri e e presente gnûfs spetacui: “Achille Chiabotto medico condotto” tal 2017; “13 a tavola” tal 2018; “Chi vuole la nonna?” tal 2022; “Chi ti credi di essere?” tal 2023; “Cercasi disperatamente anima gemella” tal 2024 e “Chi recita stasera?” tal 2025.

Il spirt di comunitât al è simpri stât vîf e fuart e viodût il nestri desideri di volê proponi events che a coinvolzessin e che a rindessin la comunitât protagoniste, Officina e à realizât il spetacul entusiasmant che al à viodût la partecipazion direte dal public: il talent show “Tu sì che tu valis”, proponût te prime edizion dal 2018 e po dopo tornât a proponi sedi tal 2019, sedi tal 2022.

Tal 2017 e 2018 a son stadis proponudis lis rassegnis teatrâls tal viert “Ajarin di androne” e a partî cun il 2022, Officina e presente la rassegne teatrâl “ReinconTeatriamoci”, chest an rivade ae cuarte edizion, gracie al patrocini di FITA-UILT. Sensibii e atents a cualchi tematiche sociâl, a partî dal 2021 Officina e à presentât seradis di leture, presentazions di libris e aprofondiments.