Lis rapresentazions teatrâls a tachin benzà tal 1913, cun i zovins dal circul catolic di Segnà, presentant la comedie brilante “La giornata critica dell’avvocato”. Le ativitât e va indenant dilunc i agns 20 e 30, spaziant dal drame, ta chê volte une vore ricercjât, a lis comediis e lis farsis. Le ativitât si ferme durant la vuere, par tornâ a tacâ cun intensitât tal 1946. Ta chê volte si son formâts doi grups concorints: “La Lum” e “Il Fogolâr”, cun ideologjiis contraris, a la “Peppone e Don Camillo”. Po, si son viertis lis frontieris par chei si Segnà, che a son emigrâts come la maiôr part dai furlans, obleant i atôrs restâts tal paîs a tornâ a insaldâsi. 

Dopo alternis vicendis, tai agns ’70 le ativitât e torne a cjapâ vivôr, cun recitis in varis localitâts dal Friûl e la partecipazion ai concors teatrâi di Buie e Flumisel. Tal 1976 il taramot al met dut sotsore, teatri comprendût. Dome tal 1990, tal ambit des ativitâts sociâls de Pro Segnacco, la compagnie e torne a metisi dongje, cjapant il non di “La gote” e si iscrîf ae Associazion Teatrâl Furlane. Tal Avost dal 2001 e partecipe al “1° Concorso teatrale del Festival di Majano” e e ven segnalade par la bontât dal test.

Tai ultins agns il grup al è stât invidât a fâ spetacui in tantis localitâts dal Friûl, là che e à presentât i ultins titui: “Par amôr di Sisilute, e “A je muarte la justizie”, ma ancje “A l’oselade”, “Ursule”, “La buteghe dal barbîr”, “Il cjoc”, “Amôrs, avocâts e barufis”, “Ancje tu come chei altris”. Tai ultins timps, e vegnis apreçâts une vore ancje lis rapresentazions dai zovins dal grup, cun jessudis sedi individuâls, sedi a completament dal grup adult. Cualchi lavôr presentâ t dai zovins a son: “Il bosc de crete rosse”, “L’ingherdei”, “L’invidie”, simpri rapresentâts in lenghe furlane. In chest moment si stan preparant gnûfs spetacui par ducj i grups.