Le associazion Teatro Maravee e nas tal 2009 pe volontât di trê amîs che a apartignivin a diferentis compagniis udinesis. Il progjet al è chel di puartâ in sene tescj teatrâi comics in lenghe furlane e i motîfs a son chescj: “comics” parcè che i furlans che a son, come che si sa, grancj lavoradôrs e personis seriis, a àn bisugne ancje di ridi, cussì ur gjavìn un pocje de strache di ogni dì; “par furlan” parcè che e je la nestre lenghe, la lenghe de nestre tiere, des nestris tradizions e de nestre culture. Doprantle a teatri la judìn a restâ vive. Trop bielis che a son lis peraulis furlanis, a son dentri di nô, nus apartegnin, no podìn tradîlis, o vin il dovê di consegnâlis a chei che a vignaran dopo di nô.

A distance di trê agns de fondazion, o podìn dî che l’obietîf al è stât centrât: i nestris spetacui a finissin simpri cun entusiastichis ovazions.