“Viôt che ti rive il ben di Baldùs!” a menaçavin lis nonis di Codroip ai nevôts plui disubidients fin tai agns ’50 dal ‘900. Daûr a chel mût di dî e je la storie vere dal ultin condanât a muart tal Friûl, Angelo Balduzzo, che chest spetacul al conte midiant i monolics di vot personaçs che e àn vût a ce fâ cun lui. Vot tocs di storie, vot ponts di viste e vot veretâts par cirî le umanitât platade in cheste vicende.

Angelo Balduzzo, un zovin di Codroip, al ven “pilustrato” (arolât in maniere obligatorie tal esercit asburgjic) tal 1830; tornât a cjase, si cjate cence lidrîs e cence futûr, ma cun la ferme convinzion di scugnî svindicâsi cuintri don Giovanni Bianchi, che al crôt responsabil dal so “pilustramento”. La sere dal 29 di Jugn dal 1838 lu spiet fûr di cjase copantlu cun trê curtissadis. Arestât, processât e condanât, Angelo Balduzzo al ven picjât a Udin il prin di Fevrâr dal 1839.

La narazion si fonde su une ricercje storiche durade doi agns, che e torne a costruî cheste storie contade a vôs, di bocje in bocje, tai ultins 150 agns. Chest spetacul al torne a contâle par dâ vite a che cjadene orâl, par testemoneâ la lote dai piçui che a cirin il lôr puest te Storie, sbaliant, paiant simpri in prime persone, restant scjafoiâts dal Podê.