Ingletiere dal XV secul. Dopo di une sanganose vuere civîl tra la dinastie dai York e chê dai Lancaster, la Vuere des Dôs Rosis, al rive sul tron Enric VII, fondadôr de dinastie Tudor. So fi primarûl Artûr al spose la principesse spagnole Catarine di Aragon, ma dopo pôcs mês al mûr cence lassâ erêts. La femine e va duncje in gnocis cul fi plui zovin dal re, Indrì, che al montarà sul tron cul non di Indrì VIII.

Il zovin sovran al è ossessionât de ricercje di un erêt mascli, uniche pussibilitât par garantî la sorevivence de zovine dinastie e evitâ une gnove vuere: in chei timps, di fat, nol jere concepibil che une femine e podès rivâ sul tron.

Biei costums di principesse, un re tant fuart cuant che spietât, cardinâi e politics astûts, vueris di religjon, bielissimis regjinis, zovins amants e une femine che, cence apartignî ae alte nobiltât, come une pavee e si svicine ae lûs de flame reâl, fintremai a restâ impiade e consumade dentri di jê.

Un spetacul presentât come adat ai fruts, ma che in realtât al è un tuf tai ricuarts pai plui grancj, parcè che al alci la man cui che, a 9 agns o a 90, nol à mai sumiât di metisi un costum di principesse, cun tant di corone e zoiis, di jessi un re o l’amant segret di une bielissime regjine.