Contâ la storie di Angioletta Delle Rive e di sô fie Giustina sul palc di sene, daûr dal fîl naratîf che Ornella Lazzaro, autore di “Le amare erbe”, e à tiessût cuntune competence documentarie scrupulose, al veve bisugne di un sfuarç infondât a metât strade jenfri la ricercje storiche e la vision pitoriche.

Ce soluzion, duncje, par trasmeti in maniere seniche cheste storie umane e sociâl, che e viôt lis dôs feminis come protagonistis di un procès di striarie intal Friûl dal sîscent?

La rispueste e va cirude te lûs, e ancjemò di plui tal dualisim lûs – scûr e te dimension scuriste de piture dal Caravaggio, di dulà che a nassin i personaçs, la lôr storie e i fruçons testemoniâls, che ju viodin leâts a lis protagonistis

Dongje des sugjestions pitorichis e van evidenziadis, come moments di evocazion, la peraule e il mot, peculiârs te costruzion psicologjiche dai personaçs e de rêt di conessions che ju viôt leâts un cun chel altri, intune architeture dramaturgjiche precise inte ricostruzion dai fâts,  rindint ogni testemoni part di une coralitât insistente sene dopo sene, come il cori des aghis, chês dal flum Nunciel e la antighe roie tal moviment perpetui des ruedis dal vecjo mulin dilunc des rivis.