Scrite durant il lockdown, inspirantsi a “Er cassamortaro”, cjaval di bataie di Gigi Proietti, la comedie e viôt al centri de storie une famee napoletane, chê dal comendatôr Nestore, om di Clotilde e pari di Bianca, inconsolabile vedrane. La femine e je state cun regolaritât lassade dai siei morôs a pene che a son vignûts a savê dal mistîr dal pari, paron di une Premiade Dite di Onôrs Funeraris. Ma come che al diseve Dario Fo, “No ducj i laris a vegni par fâ dam” e cussì Enrico, un scassinadôr imberdeât e disocupât, jentrât di gnot te cjase di campagne dal impresari di servizis funeraris, invezit di sei denunziât ae polizie, si inamore propite di Bianca. Ecuivocs, malintindiments, colps di sene e tantis comichis di murî di ridi a son il menù di cheste farse che e vignarà servide al public cun la clare intenzion di fâlu “murî” di ridi.