Nassût tal 1977, tal imprin il “Terzo Teatro” al sielç un autôr futurist come il sovietic Vladimir Majakowskij: La cimice dal 1978 e Il bagno dal 1980. Po dopo la compagnie e fronte un autôr contrastât come Pierpaolo Pasolini (Uccellacci ed uccellini, 1981). Tal 1983 e met in sene la comedie satiriche Knock o il trionfo della medicina dal francês Jules Romains. Te Istât dal 1984 e presente L’orso ed una domanda di matrimonio di Anton Cechov e tal 1985 la satire grotesche Il suicida di Nicolaj Erdman. Daspò la sielte e cole su autôrs plui cognossûts: Provaci ancora, Sam di Woody Allen (1986), Arsenico e vecchi merletti di Joseph Otto Kesselring (1987), Il borghese gentiluomo di Moliere (1988), Fiore di cactus di Barillet e Grédy (1989) e tal 1990 l’at unic di Dario Fo Non tutti i ladri vengono per nuocere, il spetacul plui replicât e preseât di plui di 10 mil spetatôrs. 

Tal 1991 e va in sene la comedie Allegre istorie d’innamorate donne, gelosi mercanti, umani frati e pie badesse, une riduzion teatrâl dal libri Decameron di Boccaccio. Tal 1993 “Terzo Teatro” al torne ae satire di Dario Fo cun La colpa è sempre del diavolo. Tal 1994 e ven metude sù cun sucès La stravagante signora Savage di John Patrick. Tal 1995 e je la volte di Per favore ammazzatemi la… moglie! e tal 1997 di L’ospite inatteso, un zâl di Ahatha Christie. Tal 1999 al prodûs Non tutti sono uguali nella fattoria degli animali, comedie musicâl gjavade dal libri di George Orwell. Tal 2001 al presente il zâl comic La congiura degli innocenti dal film di Alfred Hitchock. Tal 2004 e je la volte di Sottobanco di Domenico Starnone, une satire su la scuele taliane. Tal 2005 la compagnie e presente Una magica notte d’estate, une comedie musicâl replicade cun sucès in ambit nazionâl. La ultime fature di Terzo Teatro e je Il matrimonio può attendere, che al à debutât a Zenâr dal 2009. 

Terzo Teatro dal 1987 al à partecipât cun lis sôs produzions a ducj i plui prestigjôs festival e rassegnis nazionâls (Pesaro, Macerata, Schio, Monza, Chioggia, Abano Terme, Salerno, Pescia-Collodi e vie indenant) vincint impuartants premis e ricognossiments. Dal 1991 Terzo Teatro al organize il festival teatra4l internazionâl “Castello di Gorizia” e dal 1996 la rassegne nazionâl di teatri comic e musicâl “Un castello di… musical & risate!”.