Il sindic, par dâ une man a inserîsi tal mont dal lavôr e tal tiessût sociâl ai “zovins” laureâts disocupâts che a vivin ancjemò a cjase dai gjenitôrs, al met a disposizion 30 apartaments te proprie citât. Al sucêt cussì che i 3 laureâts di cuarante agns e passe, “plui passe che cuarante”, e ancje “gjenis” tes materiis di competence, si cjatin a vivi, no cate lôr, sot il stes cuviert, metint in mostre la lôr inadeguatece a la cuotidianitât. La uniche robe che il sindic al domande in cambi a chescj “zovins laureâts”, al è di impegnâ cualchi ore par setemane tai servizis sociâi e al è propite durant chest timp dedicât a chel che i 3 a cognossin Lucida (une sdrondine par necessitât) e Nevio (un barbon par vocazion), i cuai a finissin par vivi, in maniere plui o mancul stabile, te gnove cjase. Dal confront tra lis comprensibilis dificoltâts dai trê “Bamboccioni” e lis dramatichis cundizions che e scuegnin vivi Lucida e Nevio, e ven fûr no dome une ingjenue comicitât, ma ancje une profonde riflession su lis sclapaduris de nestre societât.