Notiziis e imagjinis dal cors “Peraulis in sene”

Ai 9 e 10 di mai dal 2026 si è tignût a Udin il cors “Peraulis in Sene”, organizât de A.T.F. – Associazion Teatrâl Furlane insiemi cun Mateârium – laboratori di gnovis dramaturgjiis.

Guidâts cun atenzion e sensibilitât di Giulia Tollis, i dîs partecipants a àn vût la oportunitât di lavorâ sui propris tescj teatrâi intun clime di scolte, confront e colaborazion. Lis senis scritis dilunc dal laboratori a son stadis interpretadis dai compagns dal cors, permetint cussì ai autôrs di viodi lis propriis peraulis cjapâ vite su la sene.

Moment dopo moment, il laboratori si è trasformât intun spazi vif di scambi creatîf: osservazions, sugjeriments, critichis costrutivis e indicazions tecnichis si son intreçadis cui numerôs compliments fats ai aprendiscj dramaturcs, premiant la originalitât des storiis e la cualitât de scriture.

“Peraulis in Sene” si conferme cussì une impuartante ocasion di cressite artistiche e umane par cui che al vûl avicinâsi ae dramaturgjie contemporanie in lenghe furlane, valorizant gnovis ideis, gnovis vôs e gnovis formis di contâ il teatri.

Il cors al jentre ancje jenfri lis ativitâts propedeutichis al 14m Concors par la selezion di tescj teatrâi in lenghe furlane, finanziât de ARLeF. Lis iscrizions al concors a son atualmentri viertis: regolament e modul di iscrizion a son disponibii te homepage dal sît uficiâl de Associazion Teatrâl Furlane.