Si trate di une leture seniche che e met in lûs un aspiet forsit mai aprofondît in chescj decenis: il lavôr des feminis. Cheste opare e presente di fat une serie di testemoneancis diretis di feminis che in chel timp a jerin lavoradoris, maris, fiis, brûts…

Tai discors e tai scrits fats in chescj 50 agns no si à mai cjapât sul seri l’apuart impuartantissim des feminis che in chei dîs, setemanis e mês a àn continuât a tiessi i fii strassâts dal taramot e a àn tornât a tignî unide la famee, solevant i fruts de pôre, dispès slontanantju cun grant dolôr par ducj. Il lôr lavôr al è stât impuartant tant che chel dai oms che si son tirâts sù lis maniis par costruî fabrichis, cjasis e glesiis.

La autore, Valeria Murianni, e à intervistât tantis feminis di Glemone, Osôf, Dartigne, Forgjarie e vie indenant. E à fevelât a lunc cun lôr, e lôr si son vierzudis ai ricuarts in maniere istintive e imediade, cence filtris. Achì si conte ancje la storie de femine che e à metût al mont il prin frut dopo de scosse dal 6 di Mai. La sô testemoneance e à alc di incredibil par chel che e à passât, sopuartât e acetât. A son ancje lis vôs des comaris dal ospedâl di Glemone, di dulà che, in chê sere maledete, a son scjampâts, corint pes scjalis scuris, malâts e maris cui lôr fruts.

A son dutis feminis coragjosis, ma la lôr vôs no je mai stade scoltade di nissun, par chest o contìn lis lôr storiis.