La compagnie e nas a Maran Lagunâr tal 1985 cun l’intindiment principâl di promovi la culture midiant il teatri a un public di dutis lis etâts, sedi cun la metude in sene di interpretazions gnovis di oparis classichis o contemporaniis e sedi cun la organizazion di rassegnis teatrâls.

La A.T.M. e organize ancje laboratoris teatrâi par principiants e no, in colaborazion cun mestris professioniscj.

Tra lis rassegnis teatrâls, la principâl e je di sigûr “Teatro in Visinal”, rivade tal 2017 ae 27e edizion, organizade de A.T.M. in mût continui dal 1991. Tal ambit di “Teatro in Visinal” a vegnin proponûts sedi spetacui propriis dal caratar popolâr e dialetâl, sedi spetacui ospits cun atôrs professioniscj o grups di ponte dal panorame amatoriâl talian.

Dal 1999, in gracie dal incuintri cun l’atôr, regjist e pedagôc teatrâl Giuliano Bonanni, pe metude in sene dai propriis spetacui il nestri grup si è ispirât dispès ae tradizion teatrâl de “comedie dal art”, cjatant tal tipic model espressîf des mascaris di “comedie”, la clâf di leture seniche dai tescj e canevacis vie vie metûts sù.

Bisugne ricuardâsi, cun di plui, de realizazion, tal 2021, dal video scrit e diret di Andrea Regeni “Pessivendole”, lât dal dut esaurît e tornât a stampâ tal 2016, in ocasion dal 15t aniversari de prime edizion.

Dal aprofondiment de art des pessâris, l’autôr Andrea Regeni, cun lis cjançons di Carlo Scala, a ‘nd à tirât fûr il spetacul recitât e cjantât “Neta, storia di una pescivendola”, che e conte, basansi su fats pardabon sucedûts, la epopee des pessâris, feminis che a cognossevin za di frutis la fadie, tacant la lôr ativitât a pît cun il “bigol” (buinç), po cun la biciclete e daspò cun il “mosquito” (la biciclete a motôr). Storiis di feminis che a traviersavin par sù e par jù il Friûl partint di Maran par sostignî lis propriis fameis.

Tal lâ dai agns, la Assemblea Teatrale Maranese e à ricevût tancj ricognossiments, in particolâr:

• Miôr spetacul al Premi Fain-Valdemarin di Romans dal Lusinç tal 2000 cun “Le furberie di Scapino” di Molière;
• Miôr spetacul ae 3e Rassegne “Il Torrione” di Citerna (PG) tal 2003 e Miôr spetacul al 9° Festival di Teatri Spontani di Arezzo tal 2004 cun “Alla conquista delle donne” di Claudio De Maglio;
• Miôr spetacul ae 6e Rassegne “Il Torrione” di Citerna (PG) tal 2006 e Miôr spetacul al 11n Festival di Teatri Spontani di Arezzo tal 2008 cun “Donna Libera e la fortezza contesa” di Valentina Rivelli;
• Miôr spetacul Premi Bertiûl tal 2001 cun “Alla ricerca del bisato perduto”;
• Miôr spetacul ae 12e Rassegne “Il Torrione” di Citerna (PG) tal 2012 cun “Pedrolino alla riscossa” di Giuliano Bonanni;
• Premi pe miôr regjie e pal miôr atôr al concors Fain-Valdemarin di Romans dal Lusinç tal 2015 cun “Amor sei tu” tirât fûr di Romeo e Giulietta di W. Shakespeare.