Clâr di Lune e nas tal 1995. E fâs i prins pas te farse furlane. I lavôrs fats dopo a son il risultât di un continui sperimentâ e misurâsi in gnovis declinazions e tips di spetacui: poesie e musiche de tradizion, comedie brilante, teatri antîc grêc, mim e paiaç, teatri di improvisazion, teatri di ispirazion leterarie cun particolâr atenzion aes tematichis sociâls e comedie de art. Vincjecinc agns simpri vivûts cun grant impegn, tignint ben iniment e vîf l’obietîf iniziâl di sperimentâ e di fâ simpri robis gnovis, cun il sôl e unic intindiment di rivâ al cûr des personis par comunicâ temis atuâls. Cence dismenteâ i plui piçui, cun la Officina dei Desideri, laboratori stabil par fruts e fantats dulà cognossi il teatri in dutis lis sôs formis.