La storie che o contìn e je trate, cuntune vore di libertât, di une conte dal Decameron di Giovanni Boccaccio. Il Decameron e je une racuelte di cent contis curtis che l’autôr si imagjine contadis di un grup di siet fantatis e trê fantats, par passâ il timp, intant che a son intun ritîr inte campagne (une sorte di cuarantene) fûr di Florence, par evitâ la Peste Nere dal 1300. Lis contis a contin la vite di ogni dì dai marcjadants, nobii oms e feminis di glesie, cun ducj i lôr vizis e virtûts. L’intenzion e je chê di mostrâ che, se si vûl, si po scjampâ di cualsisei situazion, stât o disgracie, cun inteligjence e furbetât.

Met un convent di clausure, une novizie sussiegade, muiniis suspietosis e invidiosis, che jenfri un cjantâ, une vee di preiere e gnots di vuardie, a cirin di scuvierzi ce che al stâ sucedint. Colpe de primevere che e stâ sflorint o de clausure?

I temperaments si inflamin e tra suspiets e miezis veretâts al rive il moment di une scuvierte une vore particolâr…