Drin e Delaide al è il grup teatrâl nassût tal 1974 a Rivignan, ispirât aes caricaturis popolârs Sandrin e Adelaide, figuris umoristichis unichis te tradizion locâl. Fin dal inizi il grup al à operât sedi tal sacri, sedi tal profan, curant la secolâr rapresentazion dai Judeus, documentade dal 1615, metude in sene ogni Vinars Sant cun cuadris vivents dilunc il borc, e il Presepi vivent sot Nadâl. Tal stes moment al à puartât sui placs di sene regjonâi oparis di De Filippo, Molière, Balzac, Cechov e Rocca, oltri a une vore di comediis brilantis che i àn valût premis e ricognossiments. Tra il 2013 e il 2019 al à debutât cun “La cjamare dai mateçs”, “Puare Talie… liparis in famee”, “Miôr stâ cul mâl che si à” e il drame “Angela”. Durant chescj 40 agns al à fat plui di vincj spetacui, coinvolzint ancje zovins atôrs e destinant une part dai incàs a iniziativis benefichis. Al organize une rassegne teatrâl tal Auditorium e al colabore cul Comun e associazions te promozion di events culturâls.

Durant il COVID, il grup al à trasformât la proprie ativitât, realizant il film “Friûl Baby Criminals”, zirât dal dut sul teritori e bon di coinvolzi plui di cent personis, otignint grande atenzion mediatiche. Di chest progjet e je nassude la preziose colaborazion cun Christian Cecco, che e à favorît la cressite tecniche dal grup, cumò articolât su trê fassis di etât: Senior, Giovani e Giovanissimi. I Senior a lavorin te “L’aparence a ingjane”, i Giovanissimi a àn puartât in sene “Il fantasma di Anna B.” cuntune vierte danzade “Fiaba per la luna”, intant i Giovani a interpretin “Gli annales di Tacito”, drame semi seri cun musichis e efiets di lûs curâts di Cecco.

Insiemi al grup al agjìs dal 2008 “Mamme Papaveri”, impegnât tal acet e in events par i fruts a supuart di associazions dal teritori. Dal 2019 si son unîts ancje i “Allegri ma non troppo”, grup comic musicâl, autôr di spetacui origjinâls.