I agns a passin par ducj e i doi amîs – za protagoniscj di “Money” – si cjatin “sul tacâ de pension”. Almancul cussì si diseve une volte, cuant che il meretât assegn mensîl al jere il risultât di agns e agns di lavôr regolâr e a timp indeterminât.

Ma inte epoche dai lavôrs cence garanziis, cence dirits, cence prospetivis, cemût saraie la pension? Podìno permetisi di spietâ che e rivi o varìno di impegnâsi par garantîsi une tierce etât serene e trancuile?

No je une domande ae cuâl al sedi facil cjatâ une rispueste.

Sentâts ator di une taule tal lôr bar preferît, fra un aperitîf e une bire frescjute, i doi amîs si confidin, a proponin soluzions e si imbarcjin intune schirie di tentatîfs divertents e imberdeâts par sistemâ il lôr avignî, fin a rivâ a insumiâsi – ma dome insumiâsi – di scjadenâ une rivoluzion romantiche e utopiche: al è il paradigme che al è sbaliât, la societât umane si fonde di simpri su la convinzion che il lavôr al sedi un valôr, une ativitât indispensabile pe dignitât e pe libertât des personis.

Ma sino sigûrs?

E se la strade pe felicitât e fos une altre?

Cussì e nas une seconde domande ae cuale no je sempliç dâ une rispueste.

Intant, miôr concentrâsi sul presint: magari, cuntun pocje di fortune, e rivarà ancje la pension… E cence grandis pretesis si pues ancje rivâ a vivi contents.

In fin dai conts… al baste pôc!