E je une narazion/leture ae ricercje di umanitât e di rispiet pal popul Rom e Sinto, masse dispès no dome pôc cognossût ma ancje discognossût. Plui di 500.000 zingars a son stâts copâts tai cjamps di stermini naziscj: un gjenocidi nassût dal razisim de Gjermanie dai agns Trente, ma cun lidrîs lontanis e cun consecuencis ancjemò presintis.

Il spetacul al propon un viaç tal ricuart, tornant a puartâ a lûs une pagjine di storie masse dispès assente tai libris scolastics: un gjenocidi dismenteât, cussì come i risarciments mai dâts aes vitimis. Contâlu al devente un at dovût.

La narazion, cence retoriche, e cirìs di sanâ cul teatri cheste tragjedie colade in dismentie. E ricuarde che tai lager, dongje dai ebreus, a jerin ancje omosessuâi, opositôrs politics, Rom e Sinti, perseguitâts e copâts.

“Con la pelle color del fango” e je une conte intense cuintri il razisim: cence finzion seniche, midiant testemoneancis e imagjins, al torne a dâ dignitât a un popul, inviant a superâ i prejudizis ancjemò vuê dispès difondûts. Un spetacul che al scuvierç, al interoghe e al lasse un segn profont tal spetatôr, stimolant cussience, memorie e sens di responsabilitât coletive, par che tragjediis cussì no sedin mai plui dismenteadis o ripetudis.