Un spetacul par ricuardâ la figure di Francesco Placereani (pre Checo), om e predi furlan.

Il spetacul al nas di une frase di pre Checo Placerean, natîf di Montenârs (1920-1986), dal cuâl si propon di ricuardâ la figure carismatiche. Om dal caratar complès, al à segnade in maniere indelebile e uniche la storie de culture furlane, cussì come chê de glesie e de politiche locâl: trê ambits che al considerave instreçâts in maniere indissolubile tra di lôr.

Midiant l’alternâsi di tescj, musichis e imagjinis – e di là des valutazions, judizis e controversiis – si delinee in maniere clare, sintetiche e poetiche la determinazion, la costance, la coerence e il valôr di une persone che no je mai rivade a compromès cun nuie e nissun, tant mancul cun se stes.

Inamorât di Diu, ma soredut dal om e dal Friûl, al à spindude la sô vite par ricuardânus di no vê mai pôre di jessi nô stes e de assolude impuartance di tornâ a scuvierzi il valôr custodît in ogni persone e tal propri lûc natîf. Un difensôr dai puars che, dongje ae critiche ogni tant feroce al podê che al oprim (di ogni gjenar e stampe), nol sparagnave di sigûr ancje apassionadis ramanzinis a cui che si faseve oprimi e in particolâr ai amâts furlans, stiçantju a jessi cussients de lôr cundizion socio-culturâl pôc valorizade, se no dispès umiliade.

Il spetacul, par furlan e talian, al è fat di un collage di leturis, tescj, poesiis e contis colegadis, in maniere direte o no, a pre Checo che, compagnâts di musichis e imagjinis proietadis sul fonts, a evidenziin la diamantadure de sô personalitât, l’amôr pe sô tiere e il so popul, la energjie, la capacitât di jessi incisîf cun la peraule e il compuartament. Reson e emozion.