UN DI MANCUL al è une farse basade sul classic zâl cul cadavar tal salot. La uniche suspietade e je la contessine Rose; pal ispetôr Trumò (une sorte di ispetôr Clouseau in version furlane), un vêr e propri berdei: no si cognòs la identitât dal cadavar, al mancje il movent, al mancje la arme dal delit e, in plui, a un ciert pont si assist al colp di sene de sparizion dal cuarp distirât tal salot.Une grande cuantitât di altris personaçs, un pôc ae volte, a jentrin in sene: il marescalc, l’idraulic, un aviatôr, une comari, ducj pussibii suspietâts. Ma l’ispetôr Trumò, cun un grant colp di… inzen, al rivarà a risolvi il câs intrigât.

UN DI MANCUL, test teatrâl di Paolo Sartori dal 2006, al è risultât vincidôr de VIII edizion dal “Concors di tescj pal teatri in lenghe furlane”, sezion comiche-brilante, promovût de Associazion Teatrâl Furlane, e publicât tal volum “8° Concors par tescj teatrâi in lenghe furlane” – ATF – Udin 2008.