Al è il tierç spetacul di teatri musicâl dal dut autoprodot de Compagnie de Associazion culturâl ‘Parcè no?’ di Montenârs dopo dai fortunâts ‘No tu sâs ce che tu âs’ dal 2019 e ‘I cuars dal mus’ che dal 2023 al à cjapât sù tancj palcs de Regjon. Si trate di un Musical che al previôt musiche sunade dal vîf di une Band di professioniscj, senis recitadis e cjantis.

I oms tai secui… manieris di vivi, di vistîsi, di pensâ, di metisi in relazion un cul altri. La nestre storie par cuadris, viodude e contade di doi personaçs di ecezion, inspietâts… Condide cun lizerece e ironie, cjants e musiche. L’intindiment de Compagnie teatrâl amatoriâl ‘Parcè no?’ al è chel di valorizâ la lenghe furlane intun mût diviers dal solit, cirint di fâsi dongje a un public il plui grant pussibil. Chest graciis ae ironie de interpretazion che e rive a contâ fats storics ancje di un ciert pês cun lizerece, e ae presince dal lengaç musicâl che al rive in maniere semplice e direte al cûr dal public.

I atôrs, ducj amatoriâi, a recitin e a cjantin compagnâts di une band di musiciscj professioniscj che e sun e dal vîf. Il valôr zontât dal progjet al è la paternitât de produzion, dute interne ae Associazion: autôrs locâi a metin a disposizion la lôr creativitât par un prodot dal dut origjinâl. Lis musichis a son di Alessio de Franzoni, pianiste, armonicist e compositôr furlan, intant che i tescj dai cjants di Sara Rigo si unissin ae storie nassude de pene di Anna Placereani.