La associazion ‘Parcè no?’ e nas di un duo di pianiscj professioniscj che a àn in comun la passion pe ricercje timbriche.

Alessio de Franzoni e Sara Rigo a tachin a sunâ adun tornant a proponi musiche di autôr e, intant, creant musiche origjinâl di lôr composizion. Une vore leâts ae proprie tiere, il grup si dediche ae valorizazion de lenghe furlane ideant spetacui a teme.

Tal timp il grup si è slargjât cjapant dentri la piçule realtât corâl ‘Rose di mîl’ e cualchi component di chê che e jere stade la compagnie teatrâl ‘Il ferâl’ di Montenârs: al nas cussì il desideri di unî lis arts e creâ alc di pardabon origjinâl: il musical in marilenghe, un gjenar ancjemò no esplorât dai compositôrs furlans. Un mût dal dut gnûf di valorizâ la lenghe e la culture dal nestri Friûl, componint musiche origjinâl, in stîi diviers ma armonizâts fra di lôr, dal jazz al swing, de romanze popolâr al folk, tocs dal savôr latin o pûr oparetistic o liric, cirint simpri un lengaç semplice di scoltâ e di largje fruibilitât, cul obietîf di rivâ a un public grant, ancje aes gnovis gjenerazions.

Lis musichis di Alessio de Franzoni su tescj di Sara Rigo si tiessin cu lis storiis nassudis de pene di Anna Placereani.

Pal moment a son trê lis produzions di chest gjenar che la Associazion e à ative: ‘No tu sâs ce che tu âs’ dal 2019 (in colaborazion cul côr ‘Alpe Adria’ di Trep Grant), che al è stât metût in sene in diviers teatris de Regjon rivant al “dut esaurît” tal Teatri Palamostre di Udin, ‘I cuars dal mus’ dal 2023 patrocinât de ARLeF, e il gnûf di plante ‘Ecce homo’ dal 2026.

I spetacui a son interpretâts di atôrs no professioniscj, cetancj dai cuâi a cjantin, a proviodin senis baladis e a son compagnâts di musiche dal vîf sunade di une band di professioniscj.