Secont musical popolâr in lenghe furlane dal dut origjinâl de Associazion Culturâl “Parcè no?” di Montenârs dopo il fortunât “No tu sâs ce che tu âs” dal 2019.

Trê zovinis, fiis dai parons di une aziende agricule furlane che e prodûs vin, a cjolin trê fradis, che par amôr a si trasferissin de basse a Montenârs, un piçul paisut poiât su la concje dal Cuarnan.
Te “Cantine dai Montei” si vîf in semplicitât, ridint, lavorant, e… parcè no? … ancje barufant…
Lis trê sûrs cun caratars diferents a pensin, ognidune a so mût, al doman de famee; i trê fradis, di une bande ambizionôs, di chê altre smaniôs di trasgression, a si butin intune improbabile aventure fûr confin, che e puartarà a une serie di avigniments inspietâts, tant che a un ciert pont no ur sarà facil distrigâsi…

Cuissà cualis che a saran lis consecuencis pe simpatiche famee?