Le associazion “Parcè no?” e nas dal incuintri artistic dai pianiscj Alessio de Franzoni e Sara Rigo, unîts de passion pe ricercje timbriche e la sperimentazion musicâl. Il duet, pûr vint tal pianoforte il propri strument principâl, al esplore sonoritâts simpri gnovis doprant le armoniche, il clarinet, il flaut, i otons, lis percussions e la vôs, tornant a interpretâ tocs di autôr e componint musichis origjinâls.
Fin dai esordis, i doi musiciscj a sielzin di creâ spetacui a teme, frontant tematichis culturâls e sociâls midiant le union di musiche, leterature, poesie, teatri e fotografie. A colaborin cun studiôs e apassionâts di diviersis dissiplinis, dant vite a rapresentazions che a alternin musiche e tescj, lets o recitâts, dispès compagnâts cun imagjinis curatis par ogni ocasion.
Leât ae tiere furlane in maniere profonde, il grup si dediche ancje ae valorizazion de lenghe e tradizions locâls, recuperant melodiis popolârs e componint gnûfs tocs vocâi e strumentai. Tai agns il progjet si amplie, integrant la piçule realtât corâl “Rose di mîl” e cualchi membri de ex compagnie teatrâl “Il ferâl” di Montenârs, dant vite a une gnove forme espressive: il musical in marilenghe, un gjenar inovatîf tal panorame furlan.
Chest gnûf percors al font arts diferentis par promovi la lenghe furlane cuntun lengaç musicâl acessibil e moderni, che al spazie dal jazz al swing, dal folk ae romanze popolâr, fin a influencis latinis, operetistichis e lirichis, indreçantsi ancje a gnovis gjenerazions.
Lis musichis di Alessio de Franzoni, su tescj di Sara Rigo e trame di Anna Placereani, a àn dât vite a dôs impuartantis produzions:
- “No tu sâs ce che tu âs” (2019), in colaborazion cun il côr Alpe Adria di Trep Grant, rapresentât in tancj teatris de regjon cun grant sucès, regjistrant il dut esaurît al teatri Palamostre di Udin;
- “I cuars dal mus” (2023), patrocinât de ARLeF, che al puarte indenant il percors artistic dal grup.
Ducj i doi spetacui a metin adun atôrs no professioniscj, senis danzadis e musiche dal vîf, eseguide di une band di professioniscj, ufrint une esperience artistiche autentiche e inlidrisade in maniere profonde te culture dal Friûl.
