Tal 1970, pe iniziative dal dramaturc furlan Luigi Candoni, e nas a Udin une gnove compagnie cun il non di “Teatro Orazero”. A chest gnûf grup a daran la lôr adesion une vore dai components de formazion udinese dai “Giovani Attori”, nassude une desene di agns prime. Dopo la muart di Candoni tal 1974, il grup al reste sot de direzion di Italo Tavoschi, che al fasarà ancje di diretôr artistic e regjist fin al 1995. Tal 1982 la compagnie e decît di rindi omaç a Luigi Candoni cjapant il non di “Baraban” (dal titul di une des sôs ultimis oparis), costituintsi prime come cooperative e po dopo come associazion teatrâl.

Chestis e son lis tapis principâls di une ativitât cuarantenâl, realizade cun spirt amatoriâl, ma cun mieçs espressîfs professionâi, di cheste formazion teatrâl udinese, a vuê la plui vecje in ativitât a Udin. Tantis che mai e son lis stagjons teatrâls che si son dadis la volte, cun seradis di leturis publichis, di laboratoris pes scuelis primariis e secondariis de provincie, conferencis, rapresentazions in Italie e tal forest (Europe e Canadà), presince costante tal panorame culturâl udinês e ancje in diviersis produzions radiofonichis, televisivis e cinematografichis regjonâls, ma ancje nazionâls e internazionâls.

Al sarès masse lunc fâ un liste des tantis oparis rapresentadis, in publichis leturis pitost che realizadis sul palc. I gjenars si son alternâts, ae sperimentazion o avanvuardie, a son vignûts timps di riflession e di maturazion cun la metude in sene di oparis classichis talianis e forestis. Si è passâts di Candoni a Beckett, di Jonesco a Dorst, di Osborne al Aretino, dal Ruzante a Rosso di San Secondo, di Pirandello a Betti, da Goethe a Garcia Lorca, Di Eduardo De Filippo a Fèlicien Marceau, di Goldoni a Ibsen, di Dostojevsji a D’Annunzio, di Macchiavelli a Nievo, di Gogol a Feydeau, Di Tardieu a De Ghelderode, di Faulkner a Sartre, a Agata Christie, Erri De Luca, e vie indenant, oltri ai autôrs furlans Zorutti, Negro, Michelutti, Marioni, Chiarcossi, Giacomelli, Giotti, Gregoricchio, Pre David Maria Turoldo, Pino Roveredo e cussì indenant.