Une mari e un fi si cjatin intune dimension sureâl, une sorte di sium che ju clame dongje, dopo che la vite ju veve separâts par simpri. Al nas cussì un dialic intens, siôr di ricuarts che il timp al à slizerît scancelant cun pietât, come che al fâs simpri, i contors dal dolôr. A son Susanna Colussi e Pier Paolo Pasolini.

Jê e passe un imagjinari album la che fotografiis, articui di gjornâl, pagjinis di cuadernis a testemoniin il cori vorticôs de lôr vite ae cuâl la muart, blocant il so continui mudâ, e à dât il sens. lui al è une ombre daûr di jê e cun il so straordenari amôr la compagne in chest viaç tal passât.

Al baste pôc par capîsi, par dismovi sintiments cidinâts o dislidrisâts rancûrs che nol covente coltâ. A son simpri stâts une robe sole, lôr doi, e si fevelin come mari e fi a san fevelâsi, lassant odi, risintiment e pôris là jù, tal mont dai vîfs, la che forsit a vevin une reson di jessi, ma cumò no plui.

Susanna e Pier Paolo e tornin a lei lis poesiis di lui, intant che lis notis delicadis di une arpe a marchin i moments plui serens e la balerine a evidenzie cun la sô danze lis emozions plui contraditoris, puartant il lôr discors ancjemò plui in là, la che lis peraulis no coventin plui. Al è un svol, il lôr, che al lasse l’orôr dal idropuart di Ostia tal so scûr, al lasse ogni bruture, sburtât lontan de fuarce mastine di une disperade vitalitât.